 |
| 洪輔蔚背後联邦廣場大銀幕正直播賽馬 |
 |
| 後生仔女鐘愛嘅新潮甜品 |
 |
| L-R: Ray，艷影，輔蔚，立美，靜敏，翠群 |
 |
| 巨型越南薄餅Banh Xeo |
 |
| 只有尾指咁大嘅Cha Gio Tom |
 |
| 正越式春卷 |
 |
| 首試 Banh Dap |
兩個星期前靜敏联絡到洗艷影，所以我哋決定星期日十一月三號去試下由靜敏介紹嘅一間越南餐館。我亦好奇想睇下呢間餐館有乜嘢特別菜式咁受歡迎呢？立美真係好人應承來載我，兩個人有伴冇咁悶，因嗰間餐館响Footscray，近靜敏與輔蔚住處，但離我哋較遠，最快都要四十分鐘車程。好耐冇去Footscray，近年墨市新建好多公路，一定要帶多個「導遊」GPS以防萬一。果然俾我估中，一入City錯過一個街口就唔知點走啦，立美駕車我睇路，最後都到Footscray…但係「導遊」指我哋到一個工廠區！唔通個GPS壞咗？睇番原來我選錯街名！Hopkin 同Hocking係一「觸」之差啊，令我諗起「嗚來嗚去」嗰段古又係一「觸」之差，大鬧江湖，哈哈。好彩走返冇幾遠就見到一間綠色單鋪面嘅餐館，路邊停車位已滿，只好响後邊街泊車，然後穿過一條巷出番大街。我哋有啲担心，怕夜靜巷空，兩位…「超級靚女」遇險。註：「超級」意思係super size咁解，嘻嘻。立美話冇有怕，搵「皇爺」陪駕就OK吧！唉吖！佢掂唔掂呢？到時唔知邊個保護邊個啊…講笑啫，「皇爺」有怪莫怪，搞笑就唔識世界，哈哈。
一行入餐館就見到輔蔚，靜敏坐响唯一張大圓枱，其他全係二人枱，可想而知餐館幾細啊。只有兩位待應生，加埋老闆幫內幫外兩頭巡出巡入。已經係夜晚七點囉，艷影夫婦仲未到，我哋先點小食開胃菜，靜敏點Chả Giò Tôm。嘩！一定好食嘞！點知…當待應奉碟Chả Giò Tôm 出來，先知被老闆呃咗！六條Chả Giò 仲細過手指尾而且係用中式春卷皮！我哋問番先知道响圖片嘅照牌菜Chả Giò係特別用越南米紙包卷。唉！冇計嘞，再點多一味照牌Chả Giò，一個Bánh Đập。老闆話Bánh Dạp 係Hỏi An 特產，唔知啱唔啱？但我知一定唔係原狀，一定已改良過。嗰味都幾易做，用兩塊Bánh Tráng Mè 中間挾一塊圓形Bánh Cuốn 粉，再擺燒烤豬肉片Thịt Nướng，其難處係點樣切成六件整齊，但塊Bánh Tráng Mè 冇爛！好嘢喎。
啱啱食緊第二味Chả Giò就見艷影與Ray到達，好耐冇見佢倆，大家好開心問候長短。輔蔚有多位男士同伴，佢唔怕被吓所以大聲講笑大聲呵呵，仲當全部女生係佢嘅女朋友，哈哈…真係好搞笑。Ray大讚艷影係great chef 煮餸好食，艷影聽咗一定個心似糖咁甜嘞。我哋叫多四味餸，都算過得去啦，望番其他枱嘅食客多數係西人，當然唔會做正式越南餐囉。我應承吉如幫洪輔蔚同靜敏做三分鐘自我介紹，但食客仲未走人，飲咗幾杯就多嘢講，環境太吵燈光又暗，我哋三人決定於星期二係墨爾本賽馬節，大家再約响市中心見面做錄影。
每年十一月嘅第一個星期二係墨爾本杯，被例入維多利亞省嘅公共假期，除咗服務行業之外，所有維省工人都放假，好多公司企業甚至休埋星期一，來個long weekend大把時間去賭馬，連平時唔賭嘅好公民都會參加响公司自己搞嘅Melbourne Cup Sweep，即係買一或兩蚊一隻馬號數，如果嗰隻馬贏咗就有得收晒大家嘅錢。羸家會特別開心，因為係好意頭吖嘛！當我哋三人約中午响Flinders Street Station會面，結果靜敏臨事又有啲事要辦所以遲啲到，我只好先幫洪輔蔚錄影嘞。火車站人山人海，先生女士衣冠楚楚，特別係人人都帶帽，女士帶好靚嘅帽做頭飾，小帽加大花或羽毛，短洋裝或長禮服各出奇謀，因為分分鐘有機會上電視呢，而且有朋友同行，當然唔想自己朋友眼甘甘望其他靚女啊，好瘀吖嘛，你話係唔係呢？
我哋行過對面嘅廣場搵個靜地方做錄影，順便等靜敏。咁都好，少個人洪輔蔚會自然啲大耍演技，佢自編自導自演，我呢個業餘導演冇得揮嘞，只好忍住笑定定錄影，哈哈！靜敏一到就好快錄好，佢滔滔不絕一下嘢就講咗六分鐘，不愧係專業三級翻譯員！搞掂兩人嘅錄影之後洪輔蔚想試唐人街嘅粉麵，靜敏又有好介紹嘞，我哋去一間燒臘飯店食晏，嗰度嘅水餃麵確實好食，讚！甜姐兒靜敏當然要食飯後甜品嘞，呢次我哋要搵立美嘅囡囡所介紹嗰間甜品鋪試下。三人盲摸摸咁周圍問人先搵到一間裝飾好酷，好多後生仔女食客嘅甜品店，我哋百無禁忌嘅做番四十年前嘅「後生」仔女，哈哈！
原本我哋仲要約全部同學仔去食北京鴨，點知我發覺唔見咗好重要嘅文件，連續兩個星期，日日放工後我抄到翻轉間屋都搵唔見，所以冇晒心機上吉如貼文，又冇心情約同學仔聚會，真係好煩。如果再唔搵到，今日都唔會咁得閒寫咁多嘢嘞（又有古講，哈哈！）…我諗我要多謝立美，點解呢？事關前兩日佢打電話問我做乜冇聲氣，佢聽我訴苦後就應承幫我稟神。信不信由你！第日放工我繼續搵，一打開個櫃仔，整揸嘢跌落來，嗰份文件就現响眼前！！！可惜花咗兩個星期搵嘢而冇再聚會，今日洪輔蔚已啓程回英國，相信呢次短暫團聚加插入鳴遠畢業四十年記念冊好多美好回憶。
墨爾本樹熊隊祝洪輔蔚同學一路順風，萬事如意，再見！翠群
No comments:
Post a Comment