吳立美訪悉尼 (羅偉銓) (12/08/13)

建立及立美攝於卡市

幫襯街邊買Nem Chua

佢呢個樣就俾立美咬番啖，老花都唔帶番副眼鏡

午餐時遇上鄭海(右一)

在一間會所內開會討論

悉尼又有大人物到訪，今次真係唔話得，為咗傾明年赴美嘅四十週年同學會，及加勒比海遊輪細節，立美遠途從墨爾砵飛嚟悉尼，朝到晚返。

我同立美自從畢業後，今日係第一次見番面，梗係拍心口要去接機啦！

班機係8:45到步，我7:40就去接建立一齊去，响去機場半路就接到立美嘅電話，

原來班機早到咗，冇法為有委屈佢等多廿分鐘，立美同建立曾多次見過面，哈哈只有我，一見面
佢就話，如果我染番頭髮，就同以前一模一樣，都仲係帶住個眼鏡，至於佢都仲係咁夠份量，講事講大家睇睇吓，個樣大家都冇乜變，只係面上大家都多咗幾條皺紋，呢啲都代表咗我哋每一個人已經經歷過幾多風霜。

立美之前都嚟過悉尼好多次，所以對呢度嘅地標都不感興趣，我哋商量好決定到悉尼出名嘅越南埠卡市，呢個地方都係今個下午集會地點，因到約定時間仲有五個鐘，所以同立美行吓越南埠，呢個埠當年嗅名遠播，聞風喪膽，有毒品之城，惡霸橫行，就因為呢啲因素，政府嚟一次大清除，依家變成一個出名之遊歷區，每日人頭擁擁，想揾個停車位都艱難，假日同埋拜尾都有旅行團到訪，想食靚野非此地莫屬，亞洲餐樣樣齊，有一樣野我最留意，唔知係唔係啲亞洲人捨得洗錢買生果，想買頂級响呢處就可以揾到。

因立美在墨爾砵所住嘅區域離當地越南城比較遠，所以今次到悉尼越南埠順便買啲Xôi-Vò 同埋Nem Chua，哈哈點知因為咁，佢就俾建立取笑，話立美住响鄉下，乜都冇，激到立美冇聲出，真係估唔到，行晒成個卡市只得一檔有得賣，鬼咁好生意，要訂先至有貨，唯為俾錢落訂下午先至嚟攞囉！

今晚同立美洗塵同時送行一餐一齊攪掂，都係响卡市，為咗準時送立美出機場，最好都係Book 定枱先，唔好好似黃汝培嗰次要响餐館門口等半個鐘，我哋首選天天漁村酒樓，可惜當晚有婚宴酒席，雖然有枱俾我哋，但有酒席，啲厨咁忙，都唔會炒到好送上抬啦！我嗱嗱林打電話同隊長學濤研究，之後決定Book，永發酒家，因時間離集合尚早，我哋上車去另一地點食午餐，有咁啱得咁橋，响食午餐嘅餐廳又遇上考班鄭海同學，佢同一班教友去探訪完老人院後到嚟食午餐。

我哋三個人叫咗咸魚雞粒炒飯，椒鹽排骨炒飯，雜燴炒可，食完返番去約定集合見面之會所Club，响呢六個鐘，我哋三個傾咗好多好多野，由高一到畢業，解放後環境，到異鄉生活，起起落落，嘗盡人生酸甜苦辣，終於三點過後各人陸續到齊，隊長學濤開始討論細節，細節結果學濤將同美國籌辦人聯絡，會進一步公佈。

五點半各人移步到永發酒家，又另一輪笑哈大笑，無所不談，學濤太太莊珍同佢相識三十幾年，雖然期間亦有一段時大家什小來往，唔知做乜，我同佢每次見面都係針鋒相對，講真大家都係無惡意講笑，攪吓氣氛，等大家笑吓，佢真係再世紀繞南，牙尖嘴利，我願甘拜下鋒，建立太太詩靈亦講述佢倆如何結識邂逅及佢童年驚人經歷，各人都佩服佢嘅勇敢；膽量。之後傾傾吓唔知邊位仁兄大姐轉咗台，全枱講晒潮州話，慘！可憐我夫妻倆外省人，廣府人，唔識聽，唔知佢地講乜，唯有倆公婆拉番一曲潮州二胡(自己顧自己)，猛咁挾送，話知您，食飽先，哈哈。

各方好友，我想拜師學潮州話，有冇人願意收我為徒，等我將來有機會唱勝利雙手創，其中一句，我是潮州人時，發音發得準啲。

食完生果，糖水，結埋數都啱啱夠鐘要送立美出機場，太家一聲拜拜，保重，就曲終人散，明年加勒比海郵輪見，咁就散Band，最後一個重任就交由德芳夫妻，平安送立美出機場飛返墨爾砵，大會完滿結束。

各位看官，又多個口水佬，上述係當日花絮、正題就等澳洲隊長學濤向大家匯報。

偉銓

以下相片由樹坤提供

學濤問建立您同唔同意

立美與樹坤

幾十年冇見，就有咁嘅情況出現

攝於永發酒家內

正唔正，須然冇山珍海味，普通一餐晚飯，食得大家開開心心就足夠