.JPG) |
| 由左至右: 立美，曼燕，翠群，靜敏，輔蔚 |
.JPG) |
| 輔蔚獲封「是日皇爺」，有待婢斟茶递水，幾咁疏付 |
.JPG) |
| 立美，靜敏，曼燕，輔蔚攝於墨爾本唐人街 |
.JPG) |
| 美食之前，「嚵嘴一族」食指大動 |
.JPG) |
| 「糖人街」的甜姐兒甜哥仔 |
早前墨爾本樹熊隊已打算聚會，但一拖再拖，諗住大家隨時有機會見面吖嘛，點知接到符曼燕同學來電通知洪輔蔚同學已到墨爾本探訪親人，我們立刻義不容情相討聚會地點時間等等。短短幾日電郵，電話來往就決定於星期六，十月十二號响墨爾本唐人街一間餐館會合。曼燕真係唔話得，特登响南澳阿德雷飛墨爾本與我們聚首，翌日就返南澳。
是日曼燕與我約在Southern Cross 車站見面，然後一齊去飲早茶，適逢見到大隊人扮鬼扮馬預先慶祝萬聖節。遊行人頭湧湧，男女老幼各種膚色都有，有人刻意灑紅顏色在服裝上，面擦白粉，再點幾滴血紅色在嘴角，當見我哋錄影就特登走近，對住鏡頭唬嚇，真好笑。有好多後生靚女著白婚紗扮鬼新娘，佢哋好大方停底俾人影相。我哋兩個跟住大隊人遊行一段路，好搞笑，哈哈。
當日陽光普照，原本我哋約好下午三點响联邦廣場Federation squares見面，但係好耐冇行咁遠路，有啲吃力，所以即刻改番响唐人街一間糖水店會合。曼燕和我兩人先到甜品屋，搵張角落嘅枱坐，打算一見到靜敏與洪輔蔚就嚇佢哋，點知等咗一個多鐘頭佢哋先至珊珊來遲，搞到曼燕和我兩個要霸住張枱，唔敢行開，唔敢望企响櫃台等緊位嘅客仔，唉！為咗朋友兩肋插力都要囉，啱唔啱呢？
我哋一見到洪輔蔚就拍手歡迎，又影相又錄影好似見大明星咁，洪輔蔚笑到見牙唔見眼，哈哈。相信佢會永遠都記得墨爾本樹熊隊嘅熱情嘞。我哋邊食糖水邊吹水，好多嘢講，响甜品店坐到五點就移師到另一間餐館與吳立美會合。講起上來先知道…原來洪輔蔚係孝班正康樂組長，而我係副，真係唔好意思嘞，所謂…「海底無魚蝦做王」吖嘛！暫時代任OK 啦，嘻嘻。加埋吳立美係忠班康樂組長，呢次好囉…三個貪玩家過招，風記組長曼燕都冇我哋符嘞。靜敏最乖，耐耐先…細聲講…大聲笑哈哈。而家諗起嗰日嘅事，都忍唔住笑呢。
我哋飲飽食醉之後仲想逛夜街，嗰晚天氣真好，微風輕輕吹（其實好大風，哈哈），涼透心房，街邊有對華人夫婦用麥克風清唱中文歌，希望過路人喜歡就賞他些錢，若果佢唱除小鳳首歌「風的季節」嘅話，真係好合景象啊！…吹啊吹，讓這風吹，抹乾眼眸裡 亮晶的眼淚（花粉症，哈哈）… 好耐冇出來唐人街行夜市，好興奮，大家隨人潮慢行整個唐人街，最後返回停車場，大家講聲晚安，靜敏與洪輔蔚搭電線車，立美取車載曼燕和我回家，大家相約下星期再見… 翠群
謝謝翠群提供的珍貴照片。
ReplyDelete四十年了一直都没有機會見楊靜敏和洪輔蔚。 若不是這些照片相認, 趕那天要真的走在路上踫見了, 也未必認得出來！吉如
靜咗一排，又有新發展，得知考班同學遠途到訪澳洲，我都戥佢開心，睇相就知啦！個個笑到咁燦爛，另一方面，翠群敘述當日情況，真係多姿多彩，可惜我冇份參加，講真我都有十多年冇去墨爾砵，相信依家改變好多，將來有機會再重遊舊地。偉銓
ReplyDelete翠群仲有一件事！下個月立美飛來雪梨與我們聚會，若有時間不仿同佢一齊同大家見面，偉銓
ReplyDelete多謝吉如幫手貼文，更加要多謝師父傳授九方秘笈，至於邊個係我師父…你知我知佢唔知，哈哈。多謝偉銓嘅好意，下個月邊日呢？可能唔啱時間嘞，等我問立美先打算吧！有機會來墨爾本我哋會好好招待你…搭電線車，嘻嘻。翠群
ReplyDelete搭電綫車，好呀，最好唔好搭錯車，唔係就弊！喂！妳啲陳年舊事講晒喇，呢排唔見妳發舊日夢，我都好想發吓，但係俾妳講晒，我都唔知講乜好，呢個星期加建房間工程總算接近尾聲，真係怕怕，加建呢間房付出真係好大，為咗慳錢，自己落手做，仲賠上隻斷肩，一次怕到老。趁今晚得閒，上吉如車返幾句，翠群，四十年前嘅事妳都講咗七七八八，不如講吓三十幾年前嘅事，哈哈，都係舊吏，講吓我哋初期嚟澳洲，踏入呢個人生樂土，吉如網址全世界鳴遠同學都會睇，不如借呢個平台，介紹吓澳洲有幾好。我雖然冇去過世界各地，美國算係世界大哥大，上年有幸到訪東西岸，真係大開眼界，樣樣野都好先進，澳洲就冇佢咁吧閉啦，落後好多，但我個人已非常感謝上天能夠俾我安居响呢個多言文化國家，不如將兩地比較吓，睇係唔係真係咁好。就先由踏入澳洲第一日開始，一群難民踏出機倉就有專人指導辦入境手續，之後安排特別通道出機場上巴士，送到移民宿舍，(呢個同美國唔同，美國接收難民，要有擔保人，擔保人要安排食宿，等等，美國朋友您話係唔係咁，我都係聽返嚟啫！) 登記後獲分發房間，講真我好懷念呢段日子，無憂無慮，好似住酒店，一日三餐，夠鐘就去餐堂食西餐，食完又排隊攞過，可能响難民營冇啖好食，所以覺得餐餐都咁好味！啱時間就上英文課，有時亦有啲講座聽吓澳洲日常生活。我到嗰個時候啱啱係冬天，教會贈送衣物，雖然係舊，但教會人員好有耐心，續件試，到啱為止。單身人仕房間，有工作人員每日打掃，家庭就自理，我地呢群逃奔怒海，一踏人澳洲就得到咁嘅待遇，您會點諗，簡直係天堂，今晚講住咁多先，下會繼續。
ReplyDelete翠群，妳會幫我加把嘴，會撐我啩！我一個人寫唔到幾多，立美又話要上吉如寫野，唔知佢幾時先至開筆，德芳佢都話要加把嘴，但先要學識九方神功，哈哈到時又响吉如開武林大會。翠群我第一日踏人澳洲地係墨爾砵，HOSTEL係ALTONA，(好耐啦，唔知寫啱唔啱) ，偉銓
慢慢來（國語話）…慢慢來…解放前後仲有好多嘢講啊，等有時間再繼續，好嗎？到時你一定要幫手加鹽加醋調味啊！你都算係Melbournian囉，我仲大大聲話要招待你搭電線車，哈哈。
Delete呢幾個週末我哋都要搵時間陪「皇爺」，然後襯記憶仲新，啦啦聲記底俾大家睇。今晚又有飯局嘞，等我返來報料，千企冇行開啊！翠群